Civil Society Education Partnership (CSEP) realiza atividade lansamentu ba relatoriu peskiza rua ne’ebe ho tópiku diferente mak hanesan Assesmentu ba Projetu Konstrusaun Eskola Komunitária (PEK) iha munisipiu 4 hanesan Atauro, Baucau, Bobonaro no Covalima no ida tan mak kona-ba existénsia fasilida ICT iha Eskola Sekundária Publiku no Tékniku Vokasionál iha Timor-Leste.

Durante lansamentu ne’e, Prezidente konsellu CSEP, Sr. Francisco de Araujo hato’o nia intervensaun kona-ba objetivu husi atividade ne’e mak atu fó sai rezultadu peskiza ne’ebé durante membru CSEP sira halo ba iha suku sira liu-liu iha área rural hodi identifika problema sira iha eskola liga ho asuntu ICT iha eskola sira nomós haree ba efetividade, efisiénsia no qualidade ba projetu konstrusaun infra-estrutura ba eskola sira.

Alende ne’e Diretór Nasionál Infra-strutura Edukativa husi Ministériu Edukasaun Sr. Helio Lopes apresia ba CSEP ho membru sira nia peskiza ne’e tanba servisu hamutuk kleur ona no laos deit koalia maibe hatudu duni rezultadu servisu ne’ebé pozitivu. Nune’e Ministériu Edukasaun kontinua enkoraza ba Sociedade Civil sira atu kontinua fó opiniaun no krítiku kona-ba setór edukasaun atu bele hadi’a hamutuk liu tán. Kuaze 1,500 sala de aula mak Ministériu seidauk rezolve hotu tanba kbiit OGE nian seidauk sufisiénte atu book dala ida, tanba ne’e mak ita hotu tantu Sociedade Civil ho parseiru dezenvolvimentu sira hodi ita kontribui lesuk atu solusiona problema hirak ne’e fazeadamente iha tempu oin mai.

Sr. Gaspar Afonso hanesan mos Asesor Prinsipál ba Prezidente da Repúblika no mos membru konselu ba CSEP rekomenda ba Ministériu Edukasaun no membru CSEP sira hotu atu buka solusaun mos ba ema ho defisiénsia sira nia direitu ba edukasaun inklui sira nia Liberdade hodi goza Timor-Leste nia ukun rasik-án hanesan mos sidadaun Timorese sira seluk. Hakarak ou lakoi, edukasaun iha Timor-Leste tenki inkluzivu ba ema hotu la hare ba nia kor no fíziku.

Programa ne'e hetan apoiu husi Gabinete de Apoio Sociedade Civil, Education Out Loud (EOL) no Global Partnership for Education (GPE)

Atividade ne’e hala’o iha loron, 17 Dezembru 2024 iha salaun Esperansa Delta I, Dili.

Media CSEP