ASAUN
KONKRÉTA CSEP: hamutuk ho Education
Clusteer Group (ECG) ou Agrupamentu Servisu Emerjensia (ASE) lidera husi
Ministerio Edukasaun, Joventude no Desportu (MEJD) ajuda kontribui material
emerjensia atu suporta ba Eskola Básika Filiál Anapal, Suco Molop, Postu
Administrativu Bobonaro tamba hetan desastre anin hú no hamonu eskola refere
to’o rai. Nune’e, estudante sira
hala’o deit prosesu aprendizajem iha kapela no tur iha rai deit. Liu husi
kontribuisaun CSEP hamutuk ho ninia membru NGO lima tau hamutuk osan utuan hodi
sosa kalen, sementi, , livru, bola, kamizola no pregu haruka kareta husi MEJD
nian tula ba to’o iha EBF Anapal. Agora dadaun estudante sira konsege uza ona
fatin emerjensia ne’ebé suporta husi CSEP.
Liu husi inkontru ACETL/LEG, Sua Exia, Ministra
Edukasaun, Joventude no Desporto apresia no hato’o obrigado wain ba
kontribuisaun parseiru dezenvolvimentu edukasaun nian tomak inklui organizasaun
sosiédade sivíl hanesan CSEP.
KAMPANHA NO SOSIALIZASAUN ODS-4:
CSEP
suporta ninia membru NGO Haburas Dezenvolve Talentu (HADEZTA) realiza
aktividade Semináriu Nasional loron ida hodi konvida Lideransa Partidu Politiku
sira ne’ebé compete iha Eleisaun Antisipada tinan 2018 atu kompromete sira nia
komitmentu ba edukasaun wainhira partidu hirak ne’e manan no ukun iha period
2018-2023. Iha eventu ne’ebé realiza iha Salão Canosa Has-Laran, Manleuana ne’e
hetan partisipasaun husi estudante, professor, joventude dezempregu, media,
representante partidu hanesan FDD, MSD no representante husi Ministerio da Educação
e Cultura (MEC) iha sétimo governo constitusionál, organizasaun sosíédade sivíl
no media hodi apresenta no rona mensajen edukasaun ne’ebé hato’o husi orador
sira. Director Geral do Serviços Planeamento e Parcerias Sr. Antoninho Pires
apresenta kona-bá atinjimentu ou progressu programa governmu nian inklui hato’o
mós komitmentu Ministerio Educação nian atu aumenta persentajen orsamentu do
estado iha tinan 2019 hodi responde ba preokupasaun komunidade sira nian iha
setór Edukasaun.
