Civil Society Education Patnership (CSEP) nu’udar organizasaun sociedade civil ne’ebé servisu tau matan ba dezenvolvimentu setór edukasaun iha Timor-Leste lamenta tebes ho sidadaun ou militante Partidu CNRT sira ne’ebé tenta atu halo abuzu de poder iha instituisaun governu liu-liu Ministério Edukasaun ba pozisaun Professor / Manorin liu husi dalan ilegal.
Pozisaun ida Professor/Manorin ne’e lolos tenki mai husi méritu adadémiku ida espesiál no la’os liu husi dalan “Rekomendasaun Partidaria” Favor hapara privatizasaun iha edukasaun tanba Timor-oan hotu-hotu iha direitu atu asesu oportunidade edukativa, kualidade no equidade tuir Konstituisaun RDTL.
Iha parte seluk, Professor/a kontratadu rihun ba rihun maka lakon ona sira nia oportunidade hanorin afeita husi desijaun Ministeriu Edukasaun nian hodi hakotu sira nia kontratu servisu no barak mós lakon iha teste durante kompete iha vaga atu sai manorin.
CSEP husu ba Polítiku sira atu kontinua prátika profesionalizmu iha instituisaun estadu hotu-hotu hodi asegura boa governasaun, hakribi KKN, hakribi deskriminasaun hasoru maluk Timor-oan sira seluk, foku ba dezenvolvimentu futuru RDTL ho justu no laran moos hamutuk ho povu.
Ikus liu – RDTL ba Timor-oan Hotu !
Media CSEP, 06 de Maio de 2024
