Iha sorumutu ne’e, ekipa CSEP
apresenta servisu advokasia ne’ebé durante ne’e CSEP halo hamutuk ho ninia
membru organizasaun sociedade civil sira liu-liu oinsa mak governu bele asegura
asesibilidade oportunidade edukasaun ba ema Timor-oan hotu iha Timor-Leste ho
qualidade, equidade no inklusivu atu la husi Timor-oan ida hela iha kotuk
hanesan komitmentu governu nian ne’ebé adopta iha Objetivu Dezenvolvimentu
Sustentavel númeru hat (ODS4), Planu Estratéjiku Dezenvolvimentu Nasional
(PEDN) no Planu Estratéjiku Edukasaun Nasional (PEEN) 2011-2030. Iha biban ne’e
mos Koordenador Nasional CSEP apresenta resultadu peskiza rua hanesan Análiza
Orsamentu Geral do Estado ne’ebé aloka ba Setór Edukasaun iha tinan 2015-2020
no Youth-led Action Research (YAR) ne’ebé implementa husi joventude
Marjinalizadu sira iha Timor-Leste hanesan referensia ba futuru.
CSEP mos parseria ho plata-forma oi-oin hahu husi nivel
nasional, rejional no global hodi hasa’e konsiénsia públiku husi duadór
internasional sira atu apoio setór edukasaun iha Timor-Leste hanesan Asia South
Pacific Association for Basic and Adult Education (ASPBAE), Global Campaign for
Education (GCE) no Global Partnership for Education (GPE).
Iha fulan Abril kada tinan,
komunidade internasional inklui Timor-Leste organiza eventu ida hanaran Global
Action Week for Education (GAWE) hodi fanun entidade sira hotu atu fo
prioridade ba edukasaun hahu husi familia, sosiédade, governante, politiku nain
sira inklui ema hotu iha nasaun ida-idak. Assuntu importante ne’ebé mundu foka
ba GAWE iha tinan 2021 mak hanaran “One
Bilion Voice for Education by Protecting Education Budget and Combat COVID-19
with Education / Lian Biliaun Ida ba Edukasaun liu husi Proteje Orsamentu
Edukasaun no Kombate COVID-19 ho Edukasaun”
Iha biban ida ne’e, CSEP hamutuk
ho nia parseiru ASPBAE iha Filipina konvida Sua Exelensia, Vice Ministro
Edukasaun, Joventude no Desportu (VMEJD) Dr. Antonio Guterres atu partisipa iha
Dialogu Rejional hodi komemora eventu GAWE liu husi online/virtual ne’ebé sei
realiza iha loron Segunda-feira, 26 de Abril de 2021 oras 14:00 loraik to’o
remata hamutuk ho partisipante sira husi nasaun kuaze 36 iha mundu inklui
Timor-Leste no Sua Exelensia VMEJD disponivel atu partisipa no sai orador iha
eventu importante ne’e hamutuk ho ninia homologu sira husi Filipina, Bangladesh
no EUA.
CSEP prontu kolabora nafatin ho governu liu-liu instituisaun
edukasional sira atu kontribui ba dezenvolvimentu edukasaun iha Timor-Leste.
“Remata”
