ESTUDANTE ABANDONADU: CSEP HUSU BA GOVERNO ATU HAPARA SERSAN NO KO

 Organizasaun Civil Society Education Partnership (CSEP) hakarak husu ba governo atu tetu didiak fali desizaun hodi estende tan SERSAN no KO iha rai laran liu-liu iha Munisipiu Dili tamba regra hirak ne’e hamosu ona problema barak iha rai laran hanesan violasaun direitu humanu husi seguransa sira, povu hamlaha tamba laiha vensimentu atu sustenta moris kauza husi kompania hapara husi servisu, estudante sira abandonadu no laiha direitu atu asesu prosesu aprendizajem, povu nia produtu lokal maioria labele asesu mai merkadu nasional, negosiu setór privadu nian taka no la loke maibe selu nafatin trabalhador sira inklui aluga fatin no taxa ba estadu no seluk-seluk tan.

CSEP konsideira katak implementasaun SS no KO desde inisiu to’o agora ba dala 13 ona kuaze la fo impaktu positivu ba mudansas ekonomia rai laran maibé so aumenta tan sofrimento ba povu kbi’it laek sira liu-liu estudantes hirak nebe’e hela iha kost tenke simu konsikuensia ida ne’e no husik hela sira nia hela fatin fila ba ida-idak nia munisipiu tamba kauza husi aihan laiha, osan laiha atu selu nafatin uma kost hodi hein situasaun inserteza ida ne’e.

CSEP nia observasaun katak durante implementa EE, SS no KO la deminui problemas barak iha rai laran maibe aumenta fo tan impaktu tebes ba povu nia moris no estudantes sira iha prosesu aprendijazem. Estudantes maioria laiha fasilidade téknolojia android no osan laiha atu sosa pulsa atu asesu ba eskola online ne’ebé MEDJ lansa iha fulan hirak liu-bá. Nune’e maka programa eskola online refere benefisia deit ba grupu elit nia oan sira no husik hela diverjensia klasse ekonomia no sosiál iha povu marjinalizadu nia oan sira.

Edukasaun hanesan Direitu Humanu / Education is a Human right hanesan adopta iha ajenda global Objetivu Dezenvolvimentu Sustentavel númeru dahat (ODS-4) ho prinsipiu Laiha ema Ida Husik hela iha kotuk / No One Left Behind. Hirak ne’e hotu kontradiz ho situasaun atuál iha rai laran kauza husi impasse politika ne’ebé dura naruk, pandemia global COVID-19, desijaun governu nian durante aplika regra SS no KO inklui rekursu humanu governu nian ezekuta OGE-2021 ne’e rasik.

Liu husi mensajem ida ne’e CSEP rekomenda ba governu sentral atu bele kontinua nafatin regra jeral sira husi OMS no Ministériu da Saúde nian maibe loke dalan no fo biban ba funsionamentu prosesu aprendizajem iha eskola husi nivel hotu atu la husik ema ida iha kotuk iha edukasaun.

 

Dili, 25 de Maio de 2021

“Remata”