CSEP KONTRIBUI AIHAN BÁSIKA BA ESTUDANTE SIRA IHA DILI

Hare ba situasaun klimatika inundasaun ne’ebé akontese iha teritoriu Timor laran tomak liu-liu iha kapital Dili fo impaktu no ameasa boot tebes ba populasaun nia vida moris, uma barak mak hetan estragus inklui sasan ou material nomos ema nia vida. Dezatre naturais ida ne’e aumenta tan sofrimentu boot iha situasaun pandemia COVID19 halo ema hotu sente triste no halerik.

Rede Edukasaun Civil Society Education Partnership (CSEP) ne’ebé servisu iha area edukasaun no joventude kontribui ona ba joventude no estudante sira ne’ebé hela iha uma kos tamba dok husi inan-aman mai eskola iha Dili. Asaun karidade utuan ne’e oferese atu hakmán estudante hirak ne’e nia sofrimentu tamba sira depende deit ba inan-aman sira iha foho atu sustenta sira nia estudu no vida moris iha sidade Dili.

Hare ba difikuldades estudantes hirak ne’e mak  CSEP iha dia 7 de Abril 2021 hola inisiativa entrega kontribuisaun husi ninia reprezentante Ofisial Media Sr. Roberto Soares em nome Koordenador Nasional CSEP  liu husi Uniao Estudantes Universitarios Municipio Ermera atu bele kanaliza Ai-han nesesidaes hanesan Fos, Supermi nomos Mina hodi bele fahe ou tulun ba estudantes sira ne’ebé afeitadu husi situasaun inundasaun ida ne’e, CSEP mos rekuinhese katak ajudus hirak ne’e labele koresponde tomak ba nesesidades estudantes nian maibe bele hakaman netik sira nia situasaun hodi hein ajudus husi partes seluk ne’ebé relevante.

CSEP mos husu ba Timor oan Tomak ne’ebé iha kbi’it liu no laran luak atu bele kontinua tulun liu husi kontibuisaun ba Uniaun estudantes no orgaun social balun ne’ebé estabelese ona hodi bele fo asistensia ou tulun ba estudantes sira mak afeitadu husi impaktu inundasaun ida ne’e.

~Remata~